'Sbɛɛ 'ɛ 'sɔɔn ‑nɛ
('Dʋ 42‑72)
Kea ‑kwlɩ" ‑tea'
42
Kore 'a "nynuu 'a 'dʋ ‑nɩa 'e 'dʋ "jru o ‑tei 'a 'dʋ sbɛ 'di ɛ.
2 Ka kɔɔkpa a 'wla "ni ‑kwlɩ" nɩa' 'a ‑fli i ɛ,
'kamɔ 'ma 'wla ɛɛ' ‑fli i, 'oo 'ma Kea.
3 Kea 'a 'tʋn a nʋ 'ʋn 'ɛ, 'kmʋnɩ Kea 'a 'tʋn a 'a 'dba 'ʋn 'ɛ:
blaa nɔ" 'ɩn 'je mu ‑wɛe 'ɩn 'je Kea "jriɛ 'jee ‑ɛ?
4 'Jrʋ ‑gbao o, "maʋ o, 'ma 'na "miini 'a 'sʋ,
dɛ ‑nʋɛ ʋʋa wlu' jeejee ʋʋ 'na: ta ‑ma Kea nɩɛ‑?
5 ‑Ta 'ɩn kʋan 'e de nyiɔɔ' ‑gboo ‑ʋʋa
'mʋa‑ nʋ ‑cnuɛn" ɛ 'kpa 'mla,
‑wɛe ‑aa mua de Kea‑gbu 'di ɛ,
‑bo 'ɩn po ɛɛ' ‑tɩ' ‑kwlʋ o 'sʋ 'ma pɛe 'cɛn 'cna "kpei.
6 Dɛɛ ‑tɩ 'ɩn 'je ‑klɔn' ɛ,
Dɛɛ ‑tɩ 'ɩn 'je kple ‑ɛ?
'Kea tɔi" tbaa' nmɔ wɔn.
Kɩɩn, 'ma muɛ sɛ' poa' ke 'wlɛ.
Ɛmɛ ‑nɩ 'ma 'pʋʋi‑, 'ma Kea.
7 'Ma Kea, 'ma pɛe "kaeɛ "jrii, ɛmɛ ‑tɩ Ɛɛmɔ ke Misea ke 'de Sudɛn ‑gbuu ‑kwlɩ" ke
crɩ "kpei 'ɩn nɩa, 'ma naa ɛɛ' ‑tɩ' tɔ' "kpei i.
8 "Bi ‑gbai" ‑wee'‑ kain ɛ wɔn, "ni a klu', "ni 'a ‑gboo ke "ni 'a 'plɩ ‑wee'‑ 'pleeɛ 'ʋn "kpei.
9 ‑Bo ‑sɔn ‑sɩn' ɛ, Tʋ "bo a to 'ʋn ɛɛ' nyʋ 'a ‑tɩ' kmaa' "i,
‑Wɛe ‑bo "maʋ ɛ, 'ma ble' 'ma 'bɛɛ ɛɛ' 'nynɩ "i,
'de 'ma bae Kea ‑nyɩa" 'ʋn 'kmʋ nɩa' a.
10 'Ɩn wlu' 'ɩn 'na Kea, 'ma ‑kliosou",
dɛɛ ‑tɩ ɛ "mae 'ʋn o ɛ?
Dɛɛtɩ‑ 'ma tʋnyʋ 'je 'ʋn ‑klan" "kpei ‑te' ‑wɛe 'ɩn 'je wɛenyɔ 'kpa‑?
11 'Ma 'kpɩ ‑wee'‑ a waa i, 'ma "cɛi nʋʋ nyʋ a klu 'ʋn 'ɛ,
ʋʋa nʋ: ‑Ta ‑ma Kea ‑mɛ nɩɛ‑?
12 'Ma ‑suu, dɛɛ ‑tɩ ɛ ‑klɔn' ɛ,
'de dɛɛ ‑tɩ ɛ ‑srou" ‑ɛ?
Ɛ ‑te' Kea ‑kwlɩ", 'ma muɛ 'nynɩ ‑saa' ke 'wlɛ,
dɛ ‑nʋɛ, ɛmɛ ‑nɩ 'ma 'pʋʋi, ɛmɛ ‑nɩ 'ma Kea.